Refereynen int amoureuse
en int sotte

 Och Godt // wat lot // is my gheuallen 
 Dat ick // een stick // dus moet met allen 
 Deruen die ick oydt liefst aensach
 By haer // voorwaer // gheerne waer ick minlick
 Mijn herte // lijdt smerte // seere inlick 
 Ende langhe sal sonder verdrach 
 Ten betert Godt / diet al vermach.
  
 Al tooghen // mijn ooghen // blijden schijn
 Mijn sinnen // ghewinnen // al lijdens pijn
 Wt swaer verlanghen / dits mijn gheclach
 Haer deruen // doet steruen // sonder wonde
 Hoe soudick // al woudick // teenigher stonde
 Laten haers te doene ghewach 
 Ten betert Godt / diet al vermach.
  
 Och scheyden // met leyden // bedenck ick dy 
 Soe langher // soe strangher // valts du my 
 Dit dunckt my zijnde een hert ghelach 
 Waer by // heeft sy // my dus ghelaten 
 En can // aerm man // in gheender maten 
 Ghemercken / wat doet op eenen dach 
 Ten betert Godt diet al vermach.
  
 Princhelijck Vrouken // mijn trouken // ach 
 Plaecht // onversaecht // mijn eyghen tzijne 
 Sonder trueren // veel uren // hadden vrolic bejach 
 Maer ioleerden // bancketeerden // te biere te wijne 
 Hoet nv coempt / ware verloren pijne 
 Huer daer af te doene eenich gheurach
 Want anders / en wordet te gheenen fijne 
 Ten betert Godt diet al vermach.






Amoureuse groetenisse

 Ionstelijck groeten minnelijck voorschreuen 
 Aen v die zijt mijnder herten strae 
 Trueren werdt in mijn hert gheweuen
 Ten sy v soete ionste reae 
 Bouen allen vrouwen principae 
 Die nv inne der werelt leuen
 Medecijne substanciae 
 Ghy muecht mijnder herten ghesonde gheuen. 
  
 Gheuen muechdy my ghesonde
 In allen vren in allen tijden
 Och mocht ick leuen noch te stonde 
 Dat ghy ghaeft doch een verblijden
 Ick soude te hueghelijcker lijden 
 De sware quale die ick nv gronde 
 Ende worpen altoos druck bezijden
 In wat maertchen dat ickse vonde. 
  
 Vonde ick noch dat ghy my ghaeft
 Troost / daer ick in verblijden mochte
 Mijn herte worde daer mede ghelaeft.
 Heere Godt soe leefdick in vruechden zochte
 Ist anders oock in v ghedochte 
 Ten baedt my niet ghepijnt gheslaeft
 Tware om niet al dat ick wrochte
 Als een die verrotte willighen schaeft.
  
 Schaefdick der verrotter willighen troncken
 Drooghe stof dat waere mijn loon
 Is my v vrientschap oock ontsoncken 
 Soe moet ick volghen den seluen thoon minzame groet.    
 Noch soude ick hopen op een verschoon 
 En ware der valscher nijders voncken 
 Die altoos pooghen om ghecroon 
 Te worpene / daer voortijdts vruechden cloncken.
  
 Cloncken mijn woorden als vedel snaren
 Lieuelijck / soete ten beghinne
 Soe ickse gheerne soude verclaren 
 By goeder rechter noyaelder minne 
 Al waerdy noch soe hert van sinne
 V soude ontfermen mijn misbaren
 Maer ruudtheyt / licht met my ten thinne 
 Dus moet ic leyder vruechden sparen. 
  
 Sparen moet ick der vruechden rijsen 
 Die seer wanckele in my bloeyen
 Ten sy dat ghy my wilt bewijsen
 Dat uwe sinnen te mijwaerts vloeyen
 Secretelijck sonder yemants moeyen 
 Der wroeghers heb ick groot afgrijsen 
 Of zijder quaet cruydt daden tusschen groeyen 
 Waer by coude van liefde in v mocht rijsen.
  
 Rijsen moet ick als Liebaert snel 
 Om dat wy als nv moeten scheyden
 Vol lijdens ben ick en swaer ghequel
 En suchten sal voortaen in my spreyden
 Rouwelijck wil ick my seluen cleeden 
 Eens ter vruechden borch wordt mijn voortstel 
 Hope heeft my soe in huer beleyden 
 Adieu schoon Lief vaert eewich wel.






Refereyn amoureux

 Myn herte niet el dan druck besluyt 
 Ick vinde my seluen al swaer beducht 
 Ick haecke tot den wint wordt zuydt
 Want mijn lieffelijck lief reedt derwaerts wt
 Dus coempt van daer den zoeten lucht
 Mijn ooghen staen naer der coempste ter vlucht 
 En segghe dit woordt van wijlen eer 
 Daer lief daer ooghe / daer handt daer seer. 
  
 O zuyderste lucht die my beraeyt 
 Mijnen boesem ontdoe ick soe ick best mach
 Mijn hertken is soe vele te bat ghepaeyt
 Dat ick metten winde mach zijn bewaeyt 
 Hy coempt van daer ick hem rijden sach
 Al ist van trooste een cleyn beiach 
 Tghesichte neempt derwaerts zijnen keer
 Daer lief daer ooghe / daer handt daer seer.
  
 Ick vanghe den windt / ick en hebs niet el 
 Tconfoort is cleyne dat ick hier schouwe
 Maer men pleech te segghene in een spel 
 Een luttelken helpt den lecker wel 
 Diet nauwe staet / die nemet nauwe 
 Dus stae ick als een bedruckte vrauwe
 En haecke / ken wiste wat segghen meer
 Daer lief daer ooghe / daer handt daer seer.   
 Princhelijck Lief diemen in eeren noomt
 Daer ick eens sdaechs nae te siene pooghe
 Maer tis een saecke die luttel vroomt 
 Te siene nae eene die niet en coomt
 Dus seg ick als die tlijden dooghe 
 Daer handt daer seer / daer lief daer ooghe.






Balade

 Sulck mint dat hem is onghereedt 
 Hy waent dat hy haer herte weet 
 Als sy hem toocht een schoon ghelaet
 Hoe wel dat cranck is zijn beleedt 
 Hy maeckt hem seluen alsoe breedt 
 Oft al ware edele dat hem bestaet 
 De quade mare die van hem ghaet 
 Belet zijn houwelijck dach ende nacht 
 Nochtans sy zijns gheen ghade en slaedt 
 Sulck ketelt hem seluen dat hy lacht. 
  
 Mach hy sneuen aen haer cleedt 
 Hy sal doen sulck een bescheedt
 Van Roemene / daer noydt af was de daet
 Al waent hy lief zijn hy is leedt 
 Hy blaest datse hem noydt af en sneedt 
 Haer selfs en weet sy gheenen raedt 
 Al bloeyde in haer eens anders saet
 .............
  
 Als op haer is verweckt zijn sweedt 
 Sy en can ghesien soe stuer noch soe wreedt 
 Sy en is zijnder herten toeuerlaat 
 Hoe seere sy voormaels wte smeet 
 Hy sal volcomen haer beheet 
 Toocht sy hem ionste sonder haet 
 Al is haer meynen loos ende quaet
 Haer minne blijft zijnder sinnen pacht 
 Als waeniewaers spint hy broosch draet 
 Hy denckt nochtans dat sy hem acht
 Sulck ketelt hem seluen dat hy lacht.

 Prinche.
 Sulck houdt hem zijnde dliefste dreet 
 In gheender manieren van haer gheveet 
 Ende dat hy is vander eerster dracht 
 Sulck seer hoouaerdich zijnen steert wt spreet
 Sulck ketelt hem seluen dat hy lacht.




 

Sotte amoureusheyt
 
 Ick heete Pantken / mijn lief Pampoeseken 
 Dat gheerne een croeseken
 Licht met vruechden daert niet en gheeft 
 Ghy en saecht ten daghen noyt blijder droeseken /
 Alst appelmoeseken
 Sijn buycxken al vol gheten heeft          
 Ick mindse soe dat mijn herte beeft
 Godt wilse vercnapen 
 Want alle de sorghe die in haer cleeft 
 Dats eten en slapen
 (Men schreue niet in ses vellen van schapen) 
 Als ick haer wille een pintken schincken
 Hoe vriendelijck dat haer ooghskens pincken.
  
 Tis in mijn herte een dyamantken
 Ende huer callantken 
 Ben ick eenpaerlijck sonder vercoelen 
 Als ick met haer drincke een quantken 
 Godt loondtse Pantken 
 Seydt sy gheringhe / dats blijde gheuoelen 
 Pampoeseken seg ick voor al mijn boelen 
 Hebtstu proper sede 
 Dan seegtse Pantken / laet staen dijn loelen 
 Du foolster mede 
 Dan lachtse met rechter minnelijckhede
 Men soudes nemmermeer voldincken
 Hoe vriendelijck dat haer ooghskens pincken.
  
 Sy gaet met eenen bruynen Coocxkene 
 Ende vanden Roocxkene 
 Soe zijn haer handekens peper wit
 Haer mondeken dat rieckt vanden loocxkene
 Van haren ghesproocxkene 
 Soe is ontsteken mijnre herten pit
 Waer Paesschen hier door minnen verhit 
 Wy houweden ghereedt    
 Ende als ick haer wille verclaren dit
 Lachtse duymen breedt
 Hy en leeft niet die ten vollen weet
 Als ick segghe Pampoeseken ghaen wy drincken 
 Hoe vriendelijck dat haer ooghskens quincken. 
 
Prinche.
 Ghelijcke treckt tot ghelijcken
 Natuere can selden haer helden mincken 
 Ick en liete v nemmermeer vol gheblijcken
 Hoe vriendelijck dat haer ooghskens quincken.






Refereyn int sotte

 Een gaey // wel fraey // nisch frisch ioncwijueken 
 Ghewrocht // gecnocht // wel gent int lijueken 
 Quam laesten // met haesten // ghegaen om wijn 
 Een Rutere // een clutere // wel vroom int stijueken 
 Sprack tot haer // voorwaer // waert v gherijueken 
 Een stick // soe wild ick // wel by v zijn 
 Dat quick // sprack click // wa ghy cockijn 
 Laet wesen // van desen // meet vol mijn maetken 
 Hy stacxse // doen sprackse // v boor is fijn
 Ghemaeckt // gheraeckt // soe hebdijt gaetken 
 Het liep // doen riep // dat vroulijck vaetken
 Ach smul // meet vul // wat cost ick coopt 
 Al hortet // al stortet // mijn liefste sauernaetken 
 Gheen maetken vol voor douer loopt.
  
 Hoe gaet // hoe staet // sprack dat calantken 
 Dat dier // sprack fier // boort noch aen tcantken 
 O manneken // mijn canneken wilt vol meten
 Ick en mach // o wach // ay vuyl plauantken 
 Verstaeft // verslaeft // sluts als een wantken 
 Cockijnken // u wijnken // is al versleten 
 Hoe tdoomken // of roomken // hem sy ontseten 
 Sprack hy // tis vry // noch goedt van smaken 
 Dat lack // dier sprack // dat moet ick weten 
 Het coelt // het spoelt // soe wel die caecken
 Hy schreyde // sy seyde // wat gaen wy maken 
 Flauwaert // blauwaert // zijdy ontcnoopt 
 Eest niet // vol siet // noch meer salt laken 
 Gheen maetken vol voort ouerloopt.  
 Hy lutste // hy clutste // noch wat aent bommeken / 
 Sy creuelde // hy steuelde // sy speelden mommeken / 
 Hy greepse // doen peepse // recht als een gans
 Int donckere // den Jonckere // wijsde zy tblommeken 
 Hy dancktese // doen janctese // rechts als een stommeken 
 Hy swichte // sy lichte // tvat stappans 
 Hy duchte // sy suchte // en sprack och hans 
 Al leket // versteket // doch nederwaert
 Ghy sult // ghevult // noch vinden bijcans
 Mijn cruycxken // o buycxken // den wijn niet spaert 
 Want minlick // versinlick // verstaet den aert 
 Haeltmet // betaeltmet // ghedout ghehoopt 
 Dus meet my // soe weet ghy // waer hy bevaert 
 Gheen maetken vol voort ouerloopt.

Prinche.
 Tvrouken vroylick // frisch moylick // was poylick 
 Den wijn // die fijn // daer werdt ghestoopt 
 Godt danck // sy dranck // en sanck seer vroylick
 En sprack reyn // greyn // mijn roostken droopt 
 Gheen maetken vol voort ouerloopt.






Refereyn int sotte

 Een nauwe Maechdeken plach inde somere 
 Voor sinte Christoffels met zeepe te sittene 
 Haer vryer die was Joseph de droomere
 Maer hy viel te flau haer te verhittene
 Want om haer landeken omme te spittene
 Was haer van noode een wijder spade
 Aldus soe pijndese haer te vittene 
 Hoe sy haer pluenis quijte dade
 Dies vandt zy eenen tot hueren rade 
 Want zijn aenschijn stont op tscreepe 
 Segghende / als zijns hebbende zade 
 Ey Leckaert hoe gheerne eedtse zeepe 
  
 En doe seydt hy / ic en achts een hoseken 
 Zeepe tetene zijn vuyle manieren
 Mettien hadse een galeyers doseken 
 Vol zeepen / becleedt met lauwerieren
 Sy sprack / Lief wilt nv vruecht hanthieren
 Eedt hier af / eert al gaet te quiste 
 Doen greep hy tdoseken in een verfieren 
 Peysende / het waer quaet dat hijt miste
 Hy babbelde / niet wetende vanden liste 
 Sy loech hem hebbende binnen den reepe 
 Ende seyde / als die de loosheydt wiste
 Ey Leckaert hoe gheerne eedtse zeepe.
 Noch seydt hy ick en doe / al zijt ghi my geckende
 Maer dit doseken heeft wat anders in
 Al sprekende wordt hy schuymbeckende
 Ghelijck een zueghe meer noch min
 Hy spooch / hy blies / doe loech haer sin 
 Wetende ick hebben nv int streck
 Ende om meer lachens doen beghin
 Stackse hem een coecxken inden beck
 Van spaenscher zeepe / twas al te gheck
 Hy swalcht voor caes / twas vander leepe
 Hy walchde / ende sy dede een ontdeck
 Ey Leckaert hoe gheerne eedtse zeepe.
  
Prinche. 
 Als vroukens haer vrijers moede zijn
 Sy messense met eenen loosen greepe
 En segghen wantse noch onder de roede zijn
 Ey Leckaert hoe gheerne eedtse zeepe.




 

Refereyn int sotte

 Hoort ghi gelubecte van hoofde nisscherkens 
 Die ghister een buyle vielt en heden een gat
 Sint Talpins ongheluckighe visscherkens 
 Der pijnen ghewoone / ende tetene half sadt
 Waghenaers die dickent maken haer badt 
 In diepe straten met laste verstelt 
 Ian tachter kinders al bachten nat 
 Mishoude ter eerster missen ghemelt 
 Die anderen menighen trap ontelt  
 Quaetslaghers die altoos hebben den tuck 
 Rompelborsen / ghildebroers qualijck int gheldt 
 Sulck als ick ben maeckt plaetse en veldt 
 Staet betacht men saeydter gheluck. 
  
 Hoordt oock nv alle ghy venus dreetkens 
 Die vingherkens dout of int oorken ruynt 
 Ende susterkens / die matten doen metten geetkens / 
 Tsauonts onder de crane alst weder bruynt 
 Wiens capellanen zijn meest voor knyen gecruynt / 
 Oude cordewaghencruyers ende sackdraghers 
 Wiens habijten met lappen meest zijn doorthuynt 
 Voort gheborsten volders ende hase Iaghers 
 Hanghemans / hondtslaghers / Cafcoenvaghers / 
 En Suypers ghewuene te lijdene druck
 Cruepele / blinde / steinders ende claghers
 Makelghen / potspinneghen ende cantknaghers 
 Staet betacht men saeydter gheluck.
  
 Hoort Canonicken van sinte Cristoffels oordene   
 En ghasthuys muyters qualijck inde pluymen 
 Die doxel fremeneuren pleghen te vermoordene / 
 Sonder wet oft vonnisse tusschen den duymen
 En quadebeleyders die anderen tlandt doen ruymen / 
 Die in hueren voedt / eer vinden eenen doren
 Dan nobels inde borse / by costuymen 
 En weeldekens die aten haer wittenbroodt voren 
 Roemers van vrouwen / wreedt versworen 
 Stinckende voor vrou Venus als den buck 
 Cappoenders teender oude placke weerdich geboren 
 Men seydt ons aldus al hebben wijs thoren 
 Staet betacht men saeydter gheluck.

Prinche.
 Dits al volcxken van cleynen proffijte
 Verslaghers die stelen menighen huck 
 Schoelien / bradende den harinck om de kijte 
 Hier te ghapene baedt niet een mijte,
 Staet betacht men saeydter gheluck.






Naer tsoete commet suere
 
 Hoe net een houeken staet ghegroeyt 
 Met soete cruydekens wel ommestelt 
 Hoe vriendelijck dat elck bloemken bloeyt
 Daer elcken lustighen sin naer helt 
 Nochtans des wijnters swaer ghewelt
 Verdrijft de schoonheydt vanden coluere
 Dat hooghe stondt / wordt neder ghevelt
 Want naer tzoete commet suere.
  
 Hoe seere hier yemandt in weelden vloeyt
 Hoe schoone hoe aerdich men yemandt telt 
 Hoe edelijck yemandt in minnen gloeyt
 Hoe solaeslijck datmen clapt oft relt 
 Nochtans alsment wel ouerspelt 
 Elck wordt vermoeyt van zijnen labuere
 Natuere claecht / redene scheldt
 Want naer tsoete commet suere. 

 Dese aerdtsche blijschap die ons moeyt 
 Is rechts als Ys oft sneeu die smelt
 Een cort gheduer / dat langhe vermoeyt 
 Nyemandt en voerdt met hem schadt noch gheldt 
 Ghaet ten gronde / ghy vindt ghequelt 
 Al dat leeft / in zijne natuere 
 Nemet in dancke in duecht verseldt
 Want naer tsoete commet suere.

Prinche.
 Onslieder schip leeght cranck gheboeydt 
 Inde zee van tranen / doch moeten wy duere
 Wee hem wyens tijdt in sonden broeydt 
 Want naer tsoete commet suere.