Rosa Rosarum

Kom na my tuin waar die donkerrooi rose
Duist're geheime vertrou aan die nag;
Sonnestraal-kusse en suidewind-kose.
Drome en liefde die lang somerdag.

Kom in die soel someraande en luister
-Wanneer die nagwind hul drome verklaar-
Na die veelvuldige blommegefluister,
Bloesem en bloeisel en blad altegaar!

Kom waar die lelie - die blanke, die reine -
   Skugter haar bloesem ontbloot aan die maan,
Blou miosotis - die slanke, die kleine -
Met haar vergeet-my-nie-ogies betraan.

Kom as die maanblom - wit sy en satyne -
As 'n vorstinne verskyn in haar prag
Onder die wierook van roos en jasmyne -
Skoonste juweel op die bors van die nag!

Daar in die vywer, bestraal deur Arjana,
Open die lotus haar heilige kelk,
Dan eers bereik sy die hoogste - Nirvana -
As sy in glorie van songloed verwelk.

Bok-bokmakieries sing bly twee gesange
Wanneer die oggend ontwaak in my tuin;
Saans koer die tortel sy lied van verlange
Bo-uit die troost'lose treurwilg se kruin.

Kom in die aand en geniet van haar geure;
Foelie, jasmyn, angelier, minjonet;
Kom in die môre en kies van haar kleure:
Rooi, wit en goud, groen en blou, violet!

Kom as die skitter van dou-diamante,
Rosa Rosarum, in my Paradys,
Dat ek my blomme, my bome, my plante,
Roos van my hart, hulle weerga kan wys!

A.G. Visser (ca. 1878 - 1929)

bokmakierie: groengele vogel met opmerkelijke kreet
minjonet: welriekende tuinplant, reseda

        Blomme

Bloeisel-tuine, bloeisel-kruine,
week met douw gestreelde bome
blaas uit blonde blomme-monde
swaar bevrugte geure-strome.

Groene en goue hallemvoue
hang, besoom met oggendvlamme.
Deur die blare heen gevare,
druip robijne om die stamme.

Glans-omwewe, wandel Lewe
(bont omsneeuw met vlokkies vlinders)
oor die lande.  Aan haar hande
hang blij-huppelende kinders.

Bo viooltjies wiegel viooltjies,
kwetter in 'n laning rose,
rij in rijgies op die twijgies-
als tot sangerkoor verkose.

Ridderspore, fier gebore,
son hul stasieuse toppies
Angeliere, slank van spiere,
neig met grasieuse koppies.

Sij-papawer tussen klawer
vlam in wind-gestreelde rije,
weef 'n drome-waas om lome,
teug-bedwelmde goue bije.

Maagde-skone anemone
bloot voor d'oë van d'oggendglore.
Madeliefies, harte-diefies,
lag vermaaklik met die môre.

Bloeisel-beelde, bloeisel-weelde
staan in kleur en glans geskrewe.
Deur die bome rose-arome
sweef en vul die wandeldrewe.

H.H. Joubert (1874 - 1929)

laning: haag; ook laan

© Kopiereg - Copyright S.A.: ..."literary or musical works or artistic works, other than photographs,
the life of the author and 50 years from the end of the year in which the author dies"...